ຂ່າວພາຍໃນປະເທດ

ກະກຽມ 15 ​ເພງ​ເພື່ອ​ຮັບ​ໃຊ້​ກອງ​ປະຊຸມ​ໃຫຍ່​ຊາວຫນຸ່ມ​ທົ່ວ​ປະ​ເທດ​ຄັ້ງ​ທີ VI

(ຂປລ) ບັນດາ​ຊາວ​ໜຸ່ມ​ລາວ​ພ້ອມ​ຈະ​ນຳ​ສະ​ເໜີ​ບົດ​ເພງ​ທັງ​​ໃນຍຸກ​ເກົ່າ-ໃໝ່​​ລວມທັງ​ໝົດ 15 ​ເພງເຂົ້າມາ​ມີ​ສ່ວນ​ຮ່ວມ ​ແລະ ຮັບ​ໃຊ້​ໃນ​ເວທີ​ກອງ​ປະຊຸມ​ໃຫຍ່​ ຜູ້​ ແທນ​ຊາວ​ໜຸ່ມ​ທົ່ວ​ປະ​ເທດ​ຄັ້ງ​ທີ VI ທີ່​ຈະ​ມີ​ຂຶ້ນ​ໃນ​ມໍ່ໆ​ນີ້, ​ສ່ວນ​ເນື້ອຮ້ອງ ​ແລະ ທຳນອງ​ເພງ​ນັ້ນ​ຈະ​ເນັ້ນ​ໃສ່​ການ​ປຸກລະດົມ ​ແລະ ກະຕຸກ​ຊຸກຍູ້​ໃຫ້​ຊາວ​ໜຸ່ມ ​ມີ​ຄວາມດຸ​ໝັ່ນ-​ຫ້າວຫັນ, ອົດທົນ-ພາກ​ພຽນ ​ແລະ ​ເຊີດ​ຊູ​ນ້ຳ​ໃຈ​ຮັກ​ຊາດ-ຮັກ​ບ້ານ​ເກີດ​ເມືອງ​ນອນ​ຂອງ​ຕົນ.

ອີງ​ຕາມ​ກອງ​ປະຊຸມ​ຖະ​ແຫລ​ງຂ່າວ​ກ່ຽວ​ກັບ​ການ​ນຳ​ສະ​ເໜີ​ເພງ​ຊຸດ​ໃໝ່​ເພື່ອ​ຮັບ​ໃຊ້​ກອງ​ປະຊຸມ​ໃຫຍ່​ຜູ້​ແທນ​ຊາວ​ໜຸ່ມ​ທົ່ວ​ປະ​ເທດ​ຄັ້ງ​ທີ VI ​ໄດ້​ມີ​ຂຶ້ນ​​ໃນ​ວັນ​ທີ 12 ກໍລະກົດ 2011 ທີ່​ສະມາຄົມ​ນັກ​ຂ່າວ​ແຫ່ງ ສປປ ລາວ ​ໂດຍ​ເຂົ້າ​ຮ່ວມ​ເປັນ​ປະທານ​ຂອງ ທ່ານ ສ​ົມສະໜຸກ ມີ​ໄຊ ຮອງ​ປະທານ​ສະມາຄົມ​ນັກ​ຂ່າວ​ແຫ່ງ ສປປ ລາວ, ຕາງໜ້າ​ບັນດາ​ຄ້າຍ​ເພງ​ຕ່າງໆ ​ພ້ອມ​ສື່​ມວນ​ຊົນ.

ການ​ນຳ​ສະ​ເໜີ​ເພງ​ຊຸດ​ໃໝ່​ຄັ້ງ​ນີ້​ແມ່ນ​ໄດ້​ມີ​ການ​ຮ່ວມ​ມື​ລະຫວ່າງບັນດາ​​ເຄື່ອຂ່າຍ​ໃນຄ້າຍ​ເພງລາວ​ຕ່າງໆ​, ​ກະ​ຊວງຖຸແຫລງຂ່າວ-ວັດທະນະ​ທຳ ແລະ ທ່ອງ​ທ່ຽວ, ອົງການຈັດ​ຕັ້ງ​ຊາວ​ໝຸ່ມ ​ແລະ ສະມາຄົມ​ນັກ​ຂ່າວ​ແຫ່ງ ສປປ ລາວ​​ ເພື່ອ​ກະກຽມ​ໃສ່​ກອງ​ປະຊຸມ​ໃຫຍ່​ຜູ້​ແທນ​ຊາວ​ໜຸ່ມ​ທົ່ວ​ປະ​ເທດ​ຄັ້ງ​ທີ VI ຊຶ່ງ​ເປັນ​ສ່ວນ​ໜຶ່ງ​ ຂອງ​ການ​ສ້າງ​ຂະ​ບວນການ​ຂ່ຳ​ນັບ​ຮັບ​ຕ້ອນ ​ແລະ ທັງ​ເປັນ​ການ​ລະດົມ​ທຶນ​ເຂົ້າ​ໃນ​ກອງ​ທຶນ​ພັດທະນາ​ຊາວ​ໜຸ່ມ​ລາວ​ອີກ​ດ້ວຍ.

ຕາມ​ແຜນ​ແລ້ວ, ອົງການ​ຈັດ​ຕັ້ງ​ທີ່​ຮັບຜິດຊອບ​ວຽກ​ງານ​ດັ່ງກ່າວ​ໄດ້​ເປີດ​ເຜີຍ​ວ່າ: ພ້ອມ​ຈະ​ຜະລິດ​ອອກ​ຮັບ​ໃຊ້​ກອງ​ປະຊຸມ ​ແລະ ຂາຍ​ໃຫ້ປະຊາຊົນ​ທົ່ວ​​ໄປ​ປະມານ 30.000 ​ແຜ່ນ ​ໃນ​ນັ້ນ​ໄດ້​ຕັ້ງ​ລາຄາ​ປະມານ 15.000 ກີບ/​ແຜ່ນ ​ແລະ ຈະ​ຫັກ​ອອກ 3.000 ກີບ​ເພື່ອ​ນຳ​ໃຊ້​ເຂົ້າ​ໃນ​ກອງ​ທຶນ​ພັດທະນາ​ຊາວ​ໜຸ່ມ​ລາວ.

 

ກັບສາລະບານ

 

 
ຂ່າວສານປະເທດລາວ ( ຂປລ ) - 80 ຖະໜົນເສດຖາທິລາດ, ນະຄອນຫລວງວຽງຈັນ, ສປປລາວ ໂທ: ( 856-21 ) 215402, ແຟັກ: 212446